Programa1415

Podcast de Corcovadomusica

Edición número 1415 de O Recanto do Corcovado. Puidestes escoitala o venres 6 de setembro a través de RKV Radio Vigo, e o sábado 7 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 11 de setembro a través de Radio Crónica Folk Musical e o sábado 14 na sintonía de Rádio Filispim. Con este programa abrimos oficialmente a nosa tempada 2024-2025. Con ela celebramos o noso vixésimo quinto aniversario. Adicamos o primeiro programa deste novo ciclo a novidades galegas, portuguesas e brasileiras. Dende Galiza escoitamos os últimos sinxelos de Mondra, Fillas de Cassandra e Antía Muíño. Esta última asina con “Miles de flores” unha canción fondamente suxestiva. Gravouna coa colaboración de Josune Arakistain ás voces e á trikitixa e de Greta Ch’aska á produción musical. Introducimos estas pezas recuperando “Basal”, o novo da Pedreira. Velaiquí o que será, sen dúbida, un dos discos do ano. Dende Portugal, entra o novo traballo da excepcional Maria João, novamente ben acompañada do pianista brasileiro André Mehmari. En “Algodão”, João segue a estirar as posibilidades do seu particular estilo vogal até rexistros insospeitados. Escoitamos a seguir “Desassossego”, o segundo disco da fadista lisboeta Matilde Cid, antes de vos adiantar dúas pezas de “Port’Inglês”, o novo disco de Carmen Souza. Souza naceu en Lisboa, mais ten raíces caboverdianas. Asina este traballo, novamente, coa complicidade do produtor e compositor Theo Pascal. Terédelo na rúa a través de Galileo MC a finais do presente mes de setembro. Rematamos o programa dende Brasil con Laiz e os The New Love Experience. O seu último disco, “Ela partiu”, será oficialmente editado o vindeiro 13 de xullo a través de Agogo Records.